UPSC સિવિલ સર્વિસ પરીક્ષા 2025 માં SPIPAના 34 ઉમેદવારો થયા ઉત્તીર્ણ, ભૂપેન્દ્ર પટેલએ પાઠવી હાર્દિક શુભકામના

~ગુજરાતનો ઉમેદવાર નિસાર દિશાંત સમગ્ર ભારતમાં ૧૯મા ક્રમે
~પ્રિલિમથી લઈને પર્સનાલિટી ટેસ્ટ સુધી SPIPAની માર્ગદર્શિકા અને તાલીમથી ગુજરાતના યુવાનોને પ્રતિષ્ઠિત સેવાઓમાં સ્થાન
~ગુજરાતનો ઉમેદવાર નિસાર દિશાંત સમગ્ર ભારતમાં ૧૯મા ક્રમે
Ahmedabad, Gujarat, March 06, UPSC સિવિલ સર્વિસ પરીક્ષા 2025 માં ગુજરાતના કુલ 34 જેટલા તેજસ્વી દીકરા-દીકરીઓ ઉત્તીર્ણ થયા છે, રાજ્ય ના મુખ્યમંત્રી ભૂપેન્દ્ર પટેલએ હાર્દિક શુભકામના પાઠવી છે.
નાયબ મહાનિદેશક, સ્પીપા, અમદાવાદની અખબારી યાદીમાં આજે જણાવાયું છે કે Union Public Service Commission (UPSC) દ્વારા લેવામાં આવેલી સિવિલ સર્વિસ પરીક્ષા-૨૦૨૫ના અંતિમ પરિણામમાં સરદાર પટેલ લોક પ્રસાશન સંસ્થા, અમદાવાદ ખાતે તાલીમ લીધેલા કુલ ૩૪ ઉમેદવારો અખિલ ભારતીય સેવા માટે પસંદગી પામ્યા છે, જે સંસ્થાની નોંધપાત્ર સિદ્ધિ છે.
UPSC દ્વારા તા. ૨૩ મે ૨૦૨૫ના રોજ યોજાયેલી સિવિલ સર્વિસ પ્રિલિમ પરીક્ષાનું પરિણામ તા. ૧૧ જૂન ૨૦૨૫ના રોજ જાહેર કરવામાં આવ્યું હતું. જેમાં સમગ્ર ભારતમાંથી કુલ ૧૪,૧૬૧ ઉમેદવારો મુખ્ય પરીક્ષા માટે ક્વોલિફાય થયા હતા. તેમાં SPIPA ખાતે તાલીમ લીધેલા ૨૭૨ ઉમેદવારોનો સમાવેશ થાય છે.
ત્યારબાદ મુખ્ય પરીક્ષાનું પરિણામ તા. ૧૧ નવેમ્બર ૨૦૨૫ના રોજ જાહેર થયું હતું, જેમાં સમગ્ર ભારતમાંથી ૨૩૭૬ ઉમેદવારો પર્સનાલિટી ટેસ્ટ માટે પસંદ થયા હતા. તેમાં સ્પીપાના ૮૨ ઉમેદવારોનો સમાવેશ થયો હતો.
ડિસેમ્બર ૨૦૨૫થી ફેબ્રુઆરી ૨૦૨૬ દરમિયાન યોજાયેલા પર્સનાલિટી ટેસ્ટના આધારે યુપીએસસી દ્વારા તા. ૦૫ માર્ચ ૨૦૨૬ના રોજ જાહેર કરાયેલા અંતિમ પરિણામમાં સમગ્ર ભારતમાંથી ૯૫૮ ઉમેદવારો અખિલ ભારતીય સેવા માટે પસંદ થયા છે. આ આખરી ચયનમાં સ્પીપા ખાતે તાલીમ લીધેલા ૩૪ ઉમેદવારોનો સમાવેશ થાય છે.
પર્સનાલિટી ટેસ્ટ માટે સ્પીપા દ્વારા ઉમેદવારોને નવેમ્બર ૨૦૨૫થી ફેબ્રુઆરી ૨૦૨૬ દરમિયાન વિશેષ તાલીમ આપવામાં આવી હતી. આ તાલીમમાં ૧૫ ‘મોક ઈન્ટરવ્યુ’ અને ૪ વિશેષ વ્યાખ્યાનોનું આયોજન કરવામાં આવ્યું હતું. ઉપરાંત ઇન્ટરવ્યુ માટે નવી દિલ્હી જનાર ઉમેદવારો માટે ગુજરાત ભવન ખાતે રહેવાની વ્યવસ્થા પણ કરવામાં આવી હતી.
સ્પીપા દ્વારા યુપીએસસી સિવિલ સર્વિસ પરીક્ષા માટે ઉમેદવારોને વિના મૂલ્યે તાલીમ, અભ્યાસ સામગ્રી, પુસ્તકાલય, વાંચનખંડ તથા ઇન્ટરનેટ સુવિધા ઉપલબ્ધ કરાવવામાં આવે છે. સંસ્થા દ્વારા ઉમેદવારોને માર્ગદર્શન અને શૈક્ષણિક સહાય પૂરી પાડવામાં આવતાં રાજ્યના યુવાનોને સ્પર્ધાત્મક પરીક્ષાઓમાં સફળતા મેળવવામાં મદદ મળી રહી છે.
રાજ્ય સરકાર દ્વારા ઉમેદવારોને પ્રોત્સાહિત કરવા વિવિધ પ્રકારની પ્રોત્સાહન સહાય પણ આપવામાં આવે છે. જેમાં પ્રિલિમ પરીક્ષાની તાલીમ માટે માસિક સહાય ઉપરાંત પ્રિલિમ તથા મુખ્ય પરીક્ષા પાસ કરનાર ઉમેદવારોને પણ નિર્ધારિત આર્થિક સહાય આપવામાં આવે છે.
સ્પીપા દ્વારા આપવામાં આવતી પ્રોત્સાહક સહાય મુજબ,
પ્રિલિમ પરીક્ષાની તાલીમમાં પ્રવેશ મેળવનાર ઉમેદવારોને વધુમાં વધુ સાત મહિના માટે દર મહિને રૂ.૨,૦૦૦/- પ્રોત્સાહન સહાય આપવામાં આવે છે.
UPSC સિવિલ સર્વિસની પ્રિલિમ પરીક્ષા પાસ કરનાર યુવકોને રૂ.૨૫,૦૦૦/- અને યુવતીઓને રૂ.૩૦,૦૦૦/- પ્રોત્સાહન સહાય આપવામાં આવે છે.
UPSC સિવિલ સર્વિસની મુખ્ય પરીક્ષા પાસ કરનાર યુવકોને રૂ.૨૫,૦૦૦/- અને યુવતીઓને રૂ.૩૦,૦૦૦/- પ્રોત્સાહક સહાય આપવામાં આવે છે.
સિવિલ સર્વિસ પરીક્ષામાં અંતિમ પસંદગી મેળવનાર ગુજરાતના ડોમિસાઇલ ઉમેદવાર યુવકોને રૂ.૫૧,૦૦૦/- અને યુવતીઓને રૂ.૬૧,૦૦૦/- તેમજ નોન-ડોમિસાઇલ ઉમેદવાર યુવકોને રૂ.૨૧,૦૦૦/- અને યુવતીઓને રૂ.૩૧,૦૦૦/- પ્રોત્સાહક સહાય આપવામાં આવે છે.
છેલ્લા ત્રણ વર્ષના પરિણામો અનુસાર સ્પીપાની સફળતા નોંધપાત્ર રહી છે. વર્ષ ૨૦૨૩માં ૨૬, વર્ષ ૨૦૨૪માં ૨૭ અને વર્ષ ૨૦૨૫માં ૩૪ ઉમેદવારો યુપીએસસી સિવિલ સર્વિસમાં અંતિમ રીતે પસંદ થયા છે.
સ્પીપાના મહાનિદેશક હારિત શુકલા દ્વારા આપવામાં આવતા ગુણવત્તાસભર માર્ગદર્શન તથા દોરીસંચારના પરિણામે ગુજરાતના યુવાનોને દેશની સર્વોચ્ચ સિવિલ સેવાઓમાં સ્થાન મેળવવામાં મહત્વપૂર્ણ સહાય મળી રહી છે, એમ નાયબ મહાનિદેશક, સ્પીપા, અમદાવાદની અખબારી યાદીમાં જણાવાયું છે.