Ahmedabad, Gujarat, Apr 05, ગુજરાતમાં અમદાવાદના નિકોલ સ્પોર્ટ્સ કોમ્પ્લેક્સ ખાતે ખેલ મહાકુંભ ૩.૦ અંતર્ગત રાજયકક્ષા બોક્સિંગ સ્પર્ધા યોજાઈ હતી.
સરકારી સૂત્રોએ આજે જણાવ્યું કે રાજ્યના વિવિધ જિલ્લાઓમાંથી વિજેતા થઈને રાજયકક્ષા સુધી પહોંચેલા બોક્સિંગ ખેલાડીઓએ ઉત્સાહભેર સ્પર્ધાઓમાં ભાગ લીધો હતો.
અં-૧૪ વયજૂથમાં ભાઈઓની સ્પર્ધામાં ૫ ગોલ્ડ મેડલ સાથે ડી.એલ.એસ.એસ. બનાસકાંઠા, અં-૧૭ વયજૂથમાં ભાઈઓની સ્પર્ધામાં ૮ ગોલ્ડ મેડલ સાથે એસ.એ.જી. એકેડમી અને અં-૧૭ વયજૂથમાં બહેનોની સ્પર્ધામાં ૪ ગોલ્ડ મેડલ સાથે ડી.એલ.એસ.એસ. બનાસકાંઠા ઓવરઓલ મેડલ સાથે વિજેતા થયા હતા.
વિજેતા થયેલા ખેલાડીઓને રાજય સરકાર દ્વારા મેડલ તેમજ પ્રોત્સાહનરૂપે ઈનામી રાશી એનાયત કરવામાં આવી હતી.
વ્યક્તિગત ઇવેન્ટમાં પ્રથમ દ્વીતીય અને તૃતીય વિજેતા ખેલાડીઓને અમદાવાદ મહાનગરપાલિકાના ભૂતપૂર્વ મેયરશ્રી તેમજ હાલના મ્યુનિસિપલ કાઉન્સીલર શ્રી કિરીટભાઈ પરમાર દ્વારા મેડલ આપીને સન્માનિત કરવામાં આવ્યા હતા.
અત્રે ઉલ્લેખનીય છે કે, ગુજરાત સરકારના રમતગમત, યુવા અને સાંસ્કૃત્તિક પ્રવૃત્તિઓ વિભાગની સ્વાયત્ત સંસ્થા સ્પોર્ટસ ઓથોરીટી ઓફ ગુજરાત દ્વારા યોજાઈ રહેલા ખેલમહાકુંભ ૩.૦ અંતર્ગત જિલ્લા રમત વિકાસ અધિકારી અમદાવાદ અને જિલ્લા રમતગમત અધિકારી અમદાવાદ શહેરની કચેરી દ્વારા આ સ્પર્ધાઓનું આયોજન કરવામાં આવ્યું હતું.
