ડી.એલ.એડ. પ્રવેશ પ્રક્રિયાના ઑફલાઇન રાઉન્ડના પ્રથમ દિવસે 1,500 વિદ્યાર્થીઓને પ્રવેશ

~Gujarat Education Department grants admission to around 1,500 students on the first day of the D.El.Ed. offline admission round, with Education Minister Dr. Pradyuman Vaja overseeing the process.
Gandhinagar, Gujarat, Nov 07 (VNI) : ગુજરાત રાજ્યના શિક્ષણ વિભાગ દ્વારા ડી.એલ.એડ. (D.El.Ed. – Diploma in Elementary Education) પ્રવેશ પ્રક્રિયા અંતર્ગત યોજાયેલા ઑફલાઇન રાઉન્ડના પ્રથમ દિવસે રાજ્યભરના અંદાજે 1,500 વિદ્યાર્થીઓને પી.ટી.સી. (D.El.Ed.) કોલેજોમાં પ્રવેશ ફાળવવામાં આવ્યો હતો. ધનતેરસના દિવસે મોડી રાત સુધી ચાલેલી આ પ્રક્રિયા દરમિયાન શિક્ષણ મંત્રી ડૉ. પ્રદ્યુમન વાજા સ્વયં ઉપસ્થિત રહ્યા હતા.
સરકારી સૂત્રોના જણાવ્યા અનુસાર, પ્રવેશ પ્રક્રિયાના અગાઉના ત્રણ રાઉન્ડ પૂર્ણ થયા બાદ ખાલી રહેલી બેઠકો પર જરૂરિયાતમંદ વિદ્યાર્થીઓને પ્રવેશની તક મળી રહે તે હેતુથી રાજ્ય સરકારે ઑફલાઇન રાઉન્ડ યોજવાનો નિર્ણય લીધો હતો. વિદ્યાર્થીઓના શૈક્ષણિક હિત અને ઉજ્જવળ ભવિષ્યને ધ્યાનમાં રાખીને લેવાયેલા આ નિર્ણયને માત્ર બે દિવસમાં અમલમાં મૂકવામાં આવ્યો હતો. પ્રાથમિક શિક્ષણ નિયામક પ્રકાશ ત્રિવેદી અને સંયુક્ત નિયામક બારીયાના માર્ગદર્શન હેઠળ દિવાળીના તહેવારો વચ્ચે પણ સમગ્ર પ્રક્રિયાનું આયોજન કરવામાં આવ્યું હતું.
મર્યાદિત સંસાધનો અને ટૂંકા સમયગાળામાં વહીવટી તંત્ર દ્વારા કરવામાં આવેલા સુચારુ આયોજનના પરિણામે પ્રથમ જ દિવસે અંદાજે 1,500 વિદ્યાર્થીઓને પ્રવેશ મેળવવાની તક મળી હતી. ધનતેરસના તહેવારની મોડી રાત સુધી ચાલેલી આ કામગીરીમાં અધિકારીઓ અને કર્મચારીઓએ વિદ્યાર્થીઓના હિતને પ્રાથમિકતા આપી હતી.
શિક્ષણ મંત્રી ડૉ. પ્રદ્યુમન વાજા પણ મોડી રાત્રે સ્થળ પર ઉપસ્થિત રહ્યા હતા અને લગભગ એક કલાક સુધી વિદ્યાર્થીઓ, વાલીઓ તથા શિક્ષકો સાથે સીધો સંવાદ કર્યો હતો. તેમણે કામગીરીમાં જોડાયેલા અધિકારીઓ અને કર્મચારીઓનો ઉત્સાહ વધાર્યો હતો. મંત્રીની ઉપસ્થિતિથી સમગ્ર વહીવટી ટીમમાં નવી ઊર્જાનો સંચાર થયો હતો.
આ પ્રવેશ પ્રક્રિયાને પારદર્શક અને સુવ્યવસ્થિત રીતે પૂર્ણ કરવામાં ગ્રાન્ટેડ શાળાઓના શિક્ષકો, આઉટસોર્સિંગ સ્ટાફ તથા વિદ્યાર્થીઓએ પણ ઉત્સાહભેર સહયોગ આપ્યો હતો. તહેવારની રજાઓ વચ્ચે પણ વિદ્યાર્થીઓના શૈક્ષણિક હિતને પ્રાધાન્ય આપીને રાજ્યના શિક્ષણ વિભાગે ઝડપી નિર્ણયશક્તિ, પારદર્શિતા અને વિદ્યાર્થીકેન્દ્રિત અભિગમનું ઉદાહરણ પૂરું પાડ્યું છે. VNI NEWS, Gujarat D.El.Ed Admission, D.El.Ed Offline Admission Round, 1500 Students Admission, Gujarat Education Department, PTC College Admission, Pradyuman Vaja, Gujarat Education Department, D.El.Ed Admission, Offline Admission Round, PTC Colleges, Pradyuman Vaja, Prakash Trivedi, Gujarat Education News, Student Admission, VNINews, VNINews.com