આર્ટ ઓફ લિવિંગ ઇન્ટરનેશનલ સેન્ટરમાં ગુજરાતની ભક્તિ અને સંસ્કૃતિનો ભવ્ય રંગ

~બેંગલુરુના આર્ટ ઓફ લિવિંગ ઇન્ટરનેશનલ સેન્ટરમાં ગુજરાતના 1,000થી વધુ સહભાગીઓ સાથે ભવ્ય જન્માષ્ટમી નંદોત્સવ યોજાયો, જેમાં ગરબા, અન્નકૂટ અને દહીંહાંડી મુખ્ય આકર્ષણ રહ્યા.

Bengaluru, Karnataka, Sep 07 (VNI): જન્માષ્ટમી પર્વ નિમિત્તે બેંગલુરુ સ્થિત આર્ટ ઓફ લિવિંગ ઇન્ટરનેશનલ સેન્ટરમાં ગુજરાતની ભક્તિ, સંસ્કૃતિ અને ઉત્સવનો ભવ્ય રંગ જોવા મળ્યો હતો. ગુજરાતમાંથી 1,000થી વધુ સહભાગીઓએ ગુરુદેવ શ્રી શ્રી રવિશંકરની ઉપસ્થિતિમાં યોજાયેલા વિશિષ્ટ ‘નંદોત્સવ’માં ભાગ લીધો હતો.
આર્ટ ઓફ લિવિંગ ઇન્ટરનેશનલ સેન્ટર દ્વારા જણાવાયું હતું કે કાર્યક્રમ દરમિયાન ગુજરાતી ભજનો અને ગરબાની રજૂઆતો સાથે સમગ્ર પરિસર ભક્તિમય બની ગયું હતું. પરંપરાગત પોશાકમાં સજ્જ મહિલાઓએ ગરબાની રજૂઆત કરી હતી. ઉજવણીના મુખ્ય આકર્ષણ તરીકે દહીંહાંડી અને અન્નકૂટનું આયોજન કરવામાં આવ્યું હતું, જેમાં 2,636 વાનગીઓનો ભવ્ય ભોગ ધરાવવામાં આવ્યો હતો.
કુલ 2,636 વાનગીઓમાંથી 500 વાનગીઓ 50 મહિલા સ્વયંસેવકોએ દિવસભર મહેનત કરીને તાજી તૈયાર કરી હતી. બિહાર મહોત્સવ માટે આશ્રમમાં એકત્ર થયેલા હજારો લોકો વચ્ચે બિહારની ટીમે પણ વાનગીઓનું વિશેષ યોગદાન આપ્યું હતું. આ આયોજન ‘વસુધૈવ કુટુંબકમ્’ની ભાવનાને સાકાર કરતું બન્યું હતું. આ પ્રસંગે દ્વારકાધીશ મંદિરના મુખ્ય પૂજારીઓ દ્વારા લાવવામાં આવેલા પવિત્ર મુગટથી શ્રી શ્રી રવિશંકરજીનું વિશેષ સન્માન કરવામાં આવ્યું હતું.
ગુજરાતની સમૃદ્ધ ભોજન અને સાંસ્કૃતિક પરંપરાનો ઉલ્લેખ કરતાં શ્રી શ્રી રવિશંકરજીએ કહ્યું હતું કે, “ગુજરાતની અન્નકૂટ પરંપરા અત્યંત દુર્લભ અને અનોખી છે. તેને પણ વિશ્વ ધરોહરનો દરજ્જો મળવો જોઈએ.” ભારતની સાંસ્કૃતિક વિવિધતાને દેશની સંપત્તિ ગણાવતા તેમણે કહ્યું હતું કે, “ભારતની વિવિધતા જ ભારતની સંપત્તિ છે. સૌએ તેની પ્રશંસા કરવી જોઈએ.”
જન્માષ્ટમી સમારોહમાં ગુજરાતી ભજનો, આર્ટ ઓફ લિવિંગના 200 શિક્ષકો દ્વારા રજૂ કરાયેલ લાઇવ ગરબા, દહીંહાંડી અને મહાઆરતી દ્વારા બેંગલુરુમાં ગુજરાતની ઉત્સવપ્રિયતા અને સાંસ્કૃતિક વારસો જીવંત થયો હતો. કાર્યક્રમમાં ગુજરાતી ટીવી કલાકાર મલ્હાર ઠક્કર અને પૂજા જોશી પણ ઉપસ્થિત રહ્યા હતા. સાંસ્કૃતિક કાર્યક્રમો ઉપરાંત સહભાગીઓએ ધ્યાન, શ્વાસ અભ્યાસ, જ્ઞાન અને ગહન વિશ્રાંતિ જેવી સાધનાઓમાં પણ ભાગ લીધો હતો.
શ્રીકૃષ્ણને પૂર્ણ અવતાર કેમ કહેવામાં આવે છે તે સમજાવતાં શ્રી શ્રી રવિશંકરજીએ કહ્યું હતું કે, “કૃષ્ણ ક્યારેક રાજદૂત બને છે, ક્યારેક સેવક, ક્યારેક શિષ્ય અને ક્યારેક મિત્ર. તેમણે દરેક ભૂમિકા સંપૂર્ણપણે નિભાવી.” તેમણે વધુમાં જણાવ્યું હતું કે કૃષ્ણ આપણાથી દૂર કે અલગ નથી, પરંતુ આપણી અંદર જ આત્મામાં પરમાત્માના સ્વરૂપે વિરાજમાન છે. તેમના મતે આ આંતરિક ચેતનાને અનુભવવા માટે ધ્યાન અત્યંત મહત્વપૂર્ણ છે.
આ મહોત્સવ દ્વારા ગુજરાતમાં આર્ટ ઓફ લિવિંગની 45 વર્ષની સેવા યાત્રાને પણ ઉજાગર કરવામાં આવી હતી. સંસ્થા દ્વારા કુદરતી ખેતી, જેલ સુધારણા અને પુનર્વસન, આપત્તિ રાહત, પર્યાવરણ સંરક્ષણ, યુવા નેતૃત્વ અને સર્વાંગી શિક્ષણ સહિતના ક્ષેત્રોમાં કામગીરી કરવામાં આવી છે. ગુજરાતમાં આપત્તિ રાહત અને પુનર્વસન ક્ષેત્રે પણ સંસ્થાએ વિવિધ પહેલો હાથ ધરી છે. સંસ્થાના જણાવ્યા મુજબ, આંતરિક શાંતિને બાહ્ય શાંતિનો પાયો માનીને વ્યક્તિગત પરિવર્તન દ્વારા પરિવાર, સમુદાય અને સમાજમાં સકારાત્મક પરિવર્તન લાવવાનો પ્રયાસ કરવામાં આવે છે. VNI NEWS, Gujarat Culture, Art of Living, Janmashtami, Nandotsav, Gujarati Garba, Annakut, Sri Sri Ravi Shankar, Bengaluru, VNINews VNINews.com